Raporti Botëror i Lumturisë për këtë vit, i publikuar të enjten ka renditur sërish Finlandën në krye të klasifikimit, për të tetin vit radhazi. Këtë vit, raporti, mati besimin tek të panjohurit, duke humbur qëllimisht kuletat, e duke parë se sa prej tyre i kthyen, duke e krahasuar këtë me sa kuleta mendohej se do të dorëzoheshin. Dhe numri i kuletave të kthyera ishte pothuajse dy herë më i lartë nga sa parashikonin njerëzit. Kësisoj, studimi që mblodhi prova nga e gjithë bota, zbuloi se besimi në mirësinë e të tjerëve ishte më i lidhur me lumturinë se sa mendohej më parë. Duke u kthyer tek finlanda, vendi më i lumtur në botë duket se e ka cimentuar kreun e klasifikimit pasi renditet i pari për të tetën herë ndërsa SHBA dhe Britania e Madhe humbasin shumë pozicione në listë. Sipas John Helliëell, ekonomist në Universitetin e British Columbia dhe autor i raportit, të dhënat e eksperimentit me portofolin treguan se "njerëzit janë shumë më të lumtur duke jetuar aty ku mendojnë se njerëzit kujdesen për njëri-tjetrin". Raporti i 13-të vjetor i Lumturisë Botërore, i publikuar për të shënuar Ditën Ndërkombëtare të Lumturisë të OKB-së, rendit vendet më të lumtura në botë duke u kërkuar njerëzve të vlerësojnë jetën e tyre. Finlanda përsëri zuri vendin e parë ndërsa Kosta Rika dhe Meksika kanë hyrë në 10-shen e parë për herë të parë. Si Britania e Madhe ashtu edhe SHBA-ja zbritën në listë në vendin e 23-të dhe 24-të respektivisht.