Një grua 101 vjecare në një azil pleqsh në Saxony-Anhalt u kthye në njërin prej personave të parë në vend që morën vaksinën e Pfizer dhe BioNTech. Gertrud Haases I pëlqen shumë të shëtisë, në cfarëdo lloj kohe, dhe koronavirusi nuk do ta pengojë dot. Në fillim thashe me vete se nuk kisha përse isha ndër të parët që e bëjnë vaksinën. Thashë të shikoj një herë si do të shkojë me të tjerët. por më pas mendova po c`është kjo, do ta bëj që c`ke me të! Imunizimi me vaksinën e BioNTech-Pfizer nisi në landin e Saxony-Anhalt të shtunën, një ditë përpara se Gjermania të nis zyrtarisht fushatën. Federata shpërndau disa dhjetëra mijëra doza vaksine të firmës BioNTech në rreth 27 qendra magazinimi në landet gjermane. Nga aty vaksina, sipas planifikimit, dërgohet në qendrat e vaksinimit që filluan sot me vaksinimin. Së pari do të vaksinohen personat mbi moshën 80 vjeç, forcat e kujdesit shëndetësor dhe sidomos personeli i rrezikuar në spitale.Ministri gjerman i Shëndetësisë, Jens Spahn, është shprehur më parë për vështirësi në furnizimin me vaksinën. „Në fillim do të ketë ngecje", ka thënë ai. Deri në fund të marsit do duhet të jenë në dispozicion 12 milionë doza vaksine. Për shkak se vaksina duhet të jepet dy herë, pritet vaksinimi i një numri nga 5,5 milionë deri në 6 milione vetë në Gjermani.Spahn është i mendimit, se deri në verë për të gjithë qytetarët në Gjermani do jetë e mundur „oferta e vaksinimit", për sa kohë që edhe vaksina të tjera marrin lejen e përdorimit. Krahas vaksinës së BioNTech dhe Pfizer, rol luan edhe vaksina e koncernit amerikan, Moderna, për lejimin e së cilës Agjencia Europiane e Medikamenteve EMA, pritet të vendosë më 6 janar.