Forca ajrore e Ukrainës tha se ka rrëzuar një dron të sajin, i cili kishte humbur kontrollin mbi qendër të Kievit. Për rreth 15-20 minuta, mbrëmjen e së enjtes, kishte shpërthime, ndërsa mbrojtja ajrore bënte përpjekje ta rrëzonte atë në një zonë pranë Zyrës së Presidentit. Shefi i shtabit presidencial të Ukrainës, Andriy Yermak, tha fillimisht se droni i rrëzuar, “ishte i armikut”, duke iu referuar ushtrisë pushtuese ruse. Por, forca ajrore pranoi më vonë se droni ishte ukrainas dhe se ishte shkatërruar për t’i shmangur “rrethanat e padëshirueshme”. Sipas saj, rrëzimi i dronit nuk shkaktoi viktima apo të plagosur. “Rreth orës 20.00 një dron bajraktar TB2, humbi kontrollin gjatë një fluturimi të planifikuar mbi rajonin e Kievit...më pas ai u asgjësua”, tha forca ajrore duke shtuar se shkaku, me gjasë kishte qenë një keqfunksionim teknik.