Një dron që u rrëzua në një fushë në Poloninë lindore ka shumë të ngjarë të ketë ardhur nga drejtimi i Bjellorusisë, tha një prokuror rajonal të enjten, pas incidentit të përshkruar si provokim nga ministri i mbrojtjes. Droni ushtarak ra në një fushë me misër gjatë natës së të martës, duke djegur të mbjellat, duke thyer xhamat e dritareve në shtëpitë aty pranë dhe duke shtuar tensionet në një periudhë vendimtare në përpjekjet për t'i dhënë fund luftës në Ukrainë. "Ekziston një probabilitet shumë i lartë që objekti ndoshta ka ardhur nga Bjellorusia," u tha gazetarëve një prokuror rajonal. Një zëdhënës i Ministrisë së Jashtme i tha Reuters të mërkurën se rezultatet fillestare të hetimit dhe disa ekspertë sugjerojnë se një version rus i dronit Shahed i zhvilluar nga Irani ishte i përfshirë në incidentin e fundit. Prokurori rajonal tha sidoqoftë se nuk ishte në gjendje të konfirmonte modelin e dronit. Ambasada e Bjellorusisë në Varshavë nuk iu përgjigj kërkesave për koment dhe nuk pati asnjë reagim as nga ambasada ruse. Aleati i ngushtë i Rusisë, Bjellorusia, ka mbështetur luftën e Moskës në Ukrainë. Mëngjesin e të enjtes ndërkohë Komanda Operacionale e Forcave të Armatosura Polake tha se kishte ngritur në fluturim avionët luftarakë për shkak të sulmeve ruse në Ukrainën perëndimore. Megjithatë, ajo saktësoi se nuk pati asnjë shkelje të hapësirës ajrore polake.