Inteligjenca ushtarake ukrainase tha të martën se një nga dronët e saj detar kishte shkatërruar një helikopter rus dhe kishte dëmtuar një tjetër në Detin e Zi. Në një betejë pranë bregut perëndimor të Krimesë, të martën, një dron detar Magura V5, i pajisur me raketa goditi një helikopter rus Mi-8, tha agjencia e spiunazhit të Ukrainës, GUR në Telegram. Agjencia tha se kjo ishte hera e parë që një dron detar ukrainas kishte rrëzuar një objektiv ajror. Nuk ka patur ndërkohë asnjë koment nga Rusia. Mikhail Razvozhaev, guvernatori i emëruar nga Rusia i Sevastopolit në Krime, tha në Telegram se dy mjete lundruese pa pilot u shkatërruan pranë bregut gjatë natës. Pas pushtimit në shkallë të plotë të Rusisë në shkurt 2022, Ukraina ka shtuar prodhimin e dronëve dhe ka zhvilluar dronët e sulmit detar. Rrëzimi i një helikopteri rus nga një dron i marinës ukrainase u raportua edhe nga disa blogera ushtarakë rus. Ndërkohë që agjencia e spiunazhit të ukrainës tha se një helikopter i dytë rus arriti të ulej në aeroport pasi u dëmtua në sulm. Në pamjet e publikuara nga GUR, një helikopter që fluturonte mbi ujë mund të shihej teksa shënjestrohej nga disa predha. Helikopteri është filmuar duke u rrëzuar pas sulmit. Ushtria e Kievit ka përdorur edhe më herët dronë detare për të goditur anijet luftarake dhe objektet ruse në gadishullin e Krimesë, të aneksuar nga Moska në 2014. Por, ky ishte rasti i parë kur një dron detar ukrainas shkatërron një mjet fluturues.