Dronët ukrainas sulmuan Moskën për të tretën ditë radhazi të mërkurën, duke detyruar shumicën e aeroporteve të kryeqytetit rus të mbyllen disa orë përpara se Presidenti kinez Xi Jinping të mbërrinte për një vizitë plot pompozitet, të cilën Kievi e ka bërë të qartë se e kundërshton. Xi Jinping, vendi i të cilit blen më shumë naftë dhe gaz rus se çdo vend tjetër, dhe i ka dhënë Moskës një mundësi shpëtimi ekonomik përballë sanksioneve perëndimore, mbërrin në rusi në mbrëmje. Kur u pyet gjatë një konference për shtyp në lidhje me sulmet ajrore nga të dyja palët në kryeqytetet e njëra-tjetrës, një zëdhënës i ministrisë së jashtme kineze nuk e komentoi udhëtimin e presidentit kinez, duke thënë vetëm se "prioriteti kryesor" ishte të shmangej një përshkallëzim i tensioneve. Kremlini tha se sulmet ukrainase ndaj Moskës treguan tendencën e Kievit për të kryer "akte terrorizmi" dhe se shërbimet e inteligjencës dhe ushtria e Rusisë po bënin gjithçka që ishte e nevojshme për të garantuar sigurinë e ceremonive që do të mbahen për Ditën e Fitores. Xi Jinping është udhëheqësi më i fuqishëm botëror që pritet të marrë pjesë në një paradë ushtarake në Sheshin e Kuq të Moskës të premten për të shënuar 80-vjetorin e fitores së Bashkimit Sovjetik dhe aleatëve të tij mbi Gjermaninë naziste.