Një sulm me dron ukrainas, ndër më të thellët në Rusi në më shumë se tre vjet luftë, detyroi pezullimin e përkohshëm të prodhimit në një kompani elektronike në rajonin e lumit Vollga të Çuvashia-s, tha kreu i rajonit të hënën. Gurvernatori i Çuvashia-s, Oleg Nikolayev, tha se sulmi, rreth 1,300 km larg nga kufiri me Ukrainën, nuk shkaktoi viktima. Por "u mor vendimi për të pezulluar përkohësisht prodhimin për të garantuar sigurinë e punonjësve" të ndërmarrjes ku ranë dronët, tha Nikolayev. Nuk ishte menjëherë e qartë nëse dronët shkaktuan ndonjë dëm. Nikolayev tha se një dron tjetër ra në disa fusha në zonën e kryeqytetit të rajonit, Cheboksary. Ushtria e Ukrainës tha në një deklaratë në Telegram të hënën se "të paktën dy dronë" goditën uzinën e specializuar në prodhimin e pajisjeve të navigimit që përdorën tek dronët e sulmit, bombat ajrore të telekomanduara dhe armët me precizion të lartë. Ushtria ukrainase tha se sulmi me dron shkaktoi një zjarr të madh në uzinë. Ministria ruse e mbrojtjes - e cila raporton vetëm se sa dronë u shkatërruan, jo sa u lëshuan nga Ukraina - tha në Telegram se njësitë e saj rrëzuan dy dronë mbi Çuvashia. Në total, tha ajo, sistemet e mbrojtjes ajrore shkatërruan 49 dronë ukrainas gjatë natës mbi Rusi. Kievi shpesh ka thënë se sulmet e tij brenda Rusisë synojnë shkatërrimin e infrastrukturës kyçe për përpjekjet luftarake të Moskës dhe janë në përgjigje të sulmeve të vazhdueshme ruse në Ukrainë. Uzina elektronike e goditur është në listën e sanksioneve të SHBA-së, sipas faqes së internetit të Thesarit të SHBA-së. Një sulm tjetër me dron ukrainas në rajonin Voronezh që kufizohet me Ukrainën dëmtoi ndërkohë një tubacion gazi, duke ndërprerë furnizimin me gaz për shumë shtëpi.