Ministria e Jashtme e Moldavisë ka dënuar veprimet agresive të Rusisë, pasi dy dronë hynë në hapësirën ajrore moldave dhe u rrëzuan në territorin e vendit, të dielën. Një prej dronëve u gjet nga policia në Boroseni Noi, fshat në veri të Moldavisë, rreth 45 kilometra larg kufirit ukrainas, ndërsa tjetri në fshatin jugor, Firladeni, 40 kilometra larg kufirit me Ukrainën. Të dy ishin dronë “mashtrues” të përdorur për të çorientuar mbrojtjen ajrore ukrainase. “Ne i dënojmë ashpër këto inkursione agresive dhe dënojmë sërish luftën brutale të Rusisë kundër Ukrainës”, tha ministria përmes një deklarate. Që nga fillimi i luftës së Rusisë në Ukrainë, në shkurt të vitit 2022, Moldavia ka regjistruar 15 incidente me kalimin e dronëve rusë në hapësirën ajrore moldave. Presidentja properëndimore e Moldavisë, Maia Sandu, ka fituar edhe një mandat të ri në zgjedhjet presidenciale, të mbajtura ditë më parë, ndërsa vendi ishte në udhëkryq, i ndarë mes saj dhe Alexandr Stoianoglos, kandidat i afërt me Moskën. Ajo bën thirrje të vazhdueshme për anëtarësim të vendit në Bashkimin Evropian dhe është kundër luftës në Ukrainë.