Një sistem i mbrojtjes ajrore, Patriot, i dhuruar nga anëtarja e NATO-s, Rumania u dërgua të enjten në Ukrainë. “Falënderoj çdo shtet që na ndihmon ne me mbrojtje ajrore. Një falënderim të veçantë për Rumaninë për sistemin Patriot. Së bashku mund të arrijmë efikasitet më të madh, ne mund t’i japim fund terrorit rus, duke rrëzuar bashkërisht dronët Shahed dhe raketat ruse”, shkroi në X presidenti ukrainas, Volodymyr Zelensky, ndërsa Ministria rumune e Mbrojtjes konfirmoi se sistemi Patriot është dërguar në Ukrainë. Sistemi patriot mbërriti në Kiev në të njëjtën ditë me shefin e ri të NATO-s, Mark Rutte, i cili në një vizitë të paparalajmëruar tha se do të punojë për rritjen e mbështetjes për ukrainën ndërsa vuri në pah edhe rrezikun që i kanoset anëtarëve të NATO-s, sikurse është Rumania, e cila gjendet në kufi me Ukrainën. Dronët rusë sërish sulmuan portin ukrainas të Izmajilit, duke nxitur Bukureshtin që të ngrejë në fluturim avionët luftarakë F-16 për të monitoruar situatën në orët e vona të 2 tetorit. “Mund të konfirmojmë se sistemi Patriot është dërguar në Ukrainë”, tha Constantin Spinu, zëdhënës i Ministrisë së Mbrojtjes të Rumanisë, pasi Qeveria në Bukuresht muajin e kaluar miratoi një projektligj për të mundësuar dërgimin e këtij sistemi në Kiev.