Rumania ka ngritur në fluturim avionët e saj luftarakë F16 për shkak të një sulmi me dronë rusë që kanë patur në shënjestrë jugun e ukrainës. Ministria e mbrojtjes në bukuresht tha se F16-at u ngritën pasi ishin parë dronë rusë ti drejtoheshin territorit ukrainas që ndodhet shumë pranë kufirit rumun. Ndërkohë, forcat ajrore të ukrainës thanë se sistemet kundërajrore të vendit kanë zmbrapsur sulmet e reja ruse me dronë dhe me raketa në disa rajone mëngjesin e së dielës. “Armiku sulmoi me dy raketa balistike të tipit Iskander-M, dhe me 13 dronë të llojit Shahed”, shkroi Forca Ajrore në Telegram. Sipas saj, 13 dronë u rrëzuan në rajonet Kirovohrad, Harkiv, Sumi dhe Poltava. Ndërkohë, Ministria e Mbrojtjes e Rusisë tha në Telegram se raketa e saj Iskander i ka shkatërruar dy lëshuës të raketave kundërajrore Patriot dhe një stacion radari Giraffe në fshatin Juzhin në rajonin e Odesës. Pretendimi rus nuk mund të verifikohej në mënyrë të pavarur. Më 5 korrik, trupat ruse hodhën dy bomba në qytetin Selidove në lindje të rajonit të Donjeckut, duke vrarë të paktën pesë persona dhe duke plagosur tetë të tjerë. Edhe të shtunën, Forca Ajrore e Ukrainës tha se zmbrapsi një valë sulmesh ruse me dronë në 12 rajone ukrainase.