Ish-Presidenti rus Dmitry Medvedev tha të hënën se mbetet mister se kush qëndron pas një vale ndërhyrjesh të dronëve në vende të ndryshme evropiane, por se incidentet shërbyen si një kujtesë e dobishme për evropianët për rreziqet e luftës. Medvedev, tani nënkryetar i Këshillit të Sigurisë së Rusisë, e minimizoi teorinë se ndërhyrjet e fundit, përfshirë mbylljen e aeroporteve në Gjermani dhe Danimarkë, ishin rezultat i ndonjë veprimi të lidhur me Rusinë ose forcat që simpatizojnë atë. "Njerëzit që simpatizojnë vendin tonë, në Evropë,nuk do t'i shpërdorojnë burimet e tyre duke dalë nga vendi ku po fshihen. Agjentët dhe spiunët tanë po presin një urdhër të veçantë", shkroi Medvedev në kanalin e tij zyrtar në Telegram. Medvedev, i cili ka ndërtuar reputacionin e një zëri të ashpër anti-perëndimor, tha se gjëja kryesore, pavarësisht se kush ishte përgjegjës, ishte se qytetarët evropianë kishin marrë një shije të asaj që një luftë mund të nënkuptonte për kontinentin e tyre, diçka që ai akuzoi Presidentin Francez Emmanuel Macron dhe Kancelarin Gjerman Friedrich Merz se e nxisin për arsye politike dhe financiare. "Gjëja kryesore është se evropianët me mendje të shkurtër e ndiejnë rrezikun e luftës në lëkurën e tyre. Se ata kanë frikë dhe dridhen si kafshët në një tufë që po çohet në thertore", tha Medvedev, i cili shtoi se shpresonte që njerëzit më pas mund të kthehen kundër Merz dhe Macron.