Zvicra tha të premten se po forcon sistemet e saj anti-dronë për të mbrojtur infrastrukturën ushtarake pas një rritjeje të kohëve të fundit të rasteve të shikimeve të dronëve në Evropë. Ushtria Zvicerane ka ngarkuar zyrën federale për prokurimet e mbrojtjes me blerjen e sistemeve të reja pas provave të suksesshme në terren këtë verë, tha qeveria. "Bazuar në këto gjetje dhe në përgjigje të numrit në rritje të shikimeve të dronëve", Ushtria ka udhëzuar agjencinë të prioritizojë prokurimin e sistemeve të mbrojtjes kundër dronëve, tha qeveria në një deklaratë. Njoftimi vjen një ditë pasi Ministri Zviceran i Mbrojtjes, Martin Pfister, u takua me homologun e tij gjerman dhe paralajmëroi për kërcënimin në rritje që paraqesin dronët. Në anën tjetër, zyrtarët belgë të mbrojtjes thanë se rreth 15 dronë të paidentifikuar u panë duke fluturuar mbi një bazë ushtarake në Elsenborn përpara se të kalonin në Gjermaninë fqinje, rreth orës 1:45 të mëngjesit sipas orës lokale, në orët e para të së premtes. Aeroporti i Mynihut në Gjermani u mbyll për orë të tëra gjatë natës pasi dronë me origjinë të panjohur u panë mbi të. Ky incident filloi rreth orës 22:00 të së enjtes dhe zgjati deri në orën 5:00 të mëngjesit të së premtes, kur aeroporti u rihap për fluturime. Autoritetet në të dy vendet, në belgjikë dhe gjermani, po hetojnë rastin. Mbetet e paqartë se nga erdhën tufat e dronëve, ose nëse janë të lidhur, por kjo vjen mes një vale shfaqjesh të dronëve, akteve të spiunazhit dhe sabotimit të dyshuar në Evropë, me Rusinë si të dyshuarën kryesore. Moska i quan dyshimet të pabaza. Kryeministri polak Donald Tusk ka thënë se Rusia është e angazhuar tashmë në një formë lufte me NATO-n, ndërsa tensionet mes aleatëve perëndimorë dhe Moskës përshkallëzohen akoma më tej.