Në lindje të Letonisë, anëtareë e BE dhe NATO-s, ka fluturuar një dron i dyshuar rus përmes Bjellorusisë duke u rrëzuar më pas në qytetin Rezekne. Ky incident po hetohet, bëri të ditur Ministria e Mbrojtjes në Riga. Edhe NATO është informuar. Forcat e armatosura letoneze e zbuluan objektin fluturues pa pilot në kohën që hyri në hapësirën ajrore letoneze dhe gjurmuan lëvizjen e tij. Më pas u lokalizua vendi i rrëzimit. Mbetet e paqartë se si një dron rus mundi të kalonte pa pengesa përmes Bjellorusisë në Letoni. "Kjo situatë është konfirmim i asaj, se ne duhet të vazhdojmë punën që kemi nisur për të forcuar kufirin lindor të Letonisë, duke përfshirë zhvillimin e aftësive të mbrojtjes ajrore dhe aftësive të luftës elektronike për të kufizuar aktivitetet e mjeteve ajrore pa pilot të aplikacioneve të ndryshme", tha ministri letonez i Mbrojtjes Andris Spruds. Ministria e Mbrojtjes kujtoi gjithashtu se vendi kishte zgjeruar aftësitë e tij mbrojtëse në vazhdën e luftës së agresionit të Rusisë kundër Ukrainës, e cila ka vazhduar për më shumë se dy vjet e gjysmë. Aleatët e NATO-s gjithashtu kryejnë patrullime të rregullta në hapësirën ajrore letoneze. Edhe Ministria e Mbrojtjes në Bukuresht ka bërë të ditur, se një dron rus fluturoi mbi territorin rumun të dielën në mbrëmje përpara se të hynte sërish në hapësirën ajrore të Ukrainës. Në qytetet kufitare Konstanca dhe Tulcea, ushtria lëshoi paralajmërime për popullatën në formën e mesazheve me tekst për telefonat celularë. Dy avionë luftarakë rumunë F-16 u ngritën për të vëzhguar fluturimin e dronit. Ushtria ka nisur kërkimet për mbetje të mundshme të dronëve në zonën e pabanuar të qytetit kufitar të Peripravë. NATO i ka dënuar incidentet, me zëvendës sekretarin e përgjithshëm Mirçea Geoana, që tha se nuk ka të dhëna që flasin për një sulm të qëllimshëm nga rusia ndaj aleatëve. “Por këto veprime janë të papërgjegjshme dhe potencialisht të rrezikshme," tha Geoana.