Shtetet e Bashkuara të Amerikës kanë anuluar vendosjen e raketave Tomahaëk në Gjermani, sic ishte planifikuar më parë. Me një rreze veprimi deri në 2.500 kilometra, këto raketa me rreze të mesme veprimi mund të arrinin territorin rus në rast emergjence. Qëllimi ishte që të dekurajohej Moska nga një sulm i mundshëm ndaj Gjermanisë. Për krahasim, raketa Taurus e ushtrisë gjermane ka një rreze veprimi maksimale prej 500 kilometrash. Kancelari i atëhershëm Olaf Scholz dhe presidenti i atëhershëm amerikan Joe Biden ranë dakord për vendosjen e armëve amerikane në Gjermani, në vitin 2024. Vendosja e tyre duhej të fillonte këtë vit dhe të shërbente si masë kalimtare derisa të zhvilloheshin armë evropiane të krahasueshme. Por kjo nuk do të ndodhë më. Presidenti amerikan Donald Trump, i cili nuk është kursyer ndaj kancelarit Friedrich Merz pas kritikave të tij për luftën e Iranit, ka anuluar planin e paraardhësit të tij dhe ka shkuar madje edhe më tej, duke njoftuar tërheqjen e të paktën 5000 trupave amerikane nga Gjermania.