Në një vendndodhje sekrete në Ukrainën rurale, tufa dronësh sulmi përgatiten natën dhe në heshtje të plotë për të goditur thellë brenda Rusisë. Objektivat e tyre janë strategjike: rafineritë e naftës, depot e karburantit dhe qendrat e logjistikës ushtarake. Që nga vera, fushata e dronëve me rreze të gjatë veprimi e Ukrainës është rritur ndjeshëm, duke goditur infrastrukturën energjetike në të gjithë Rusinë dhe duke stërmunduar mbrojtjet ajrore të Moskës. Të ndërtuar nga pjesë të prodhuara në një rrjet të shpërndarë fabrikash, këta dronë tani fluturojnë shumë më larg se fronti i luftës. Operatorët lëvizin me saktësi. Njëri pas tjetrit, dronët ngrihen nga një pistë e improvizuar dhe drejtohen në lindje. Sulmet kanë shkaktuar mungesa karburanti në Rusi, madje kanë detyruar racionimin në disa rajone, duke nënvizuar një dobësi në rritje në infrastrukturën e vendit. Analistët perëndimorë thonë se sulmet ndaj infrastrukturës energjetike deri më tani kanë pasur një efekt serioz, por jo shkatërrues. Dronët ukrainas kanë goditur vazhdimisht 16 rafineri të mëdha ruse, që përfaqësojnë rreth 38% të kapacitetit të rafinimit të vendit. Por ndikimi aktual ka qenë dukshëm më i kufizuar: shumica e impianteve kanë rifilluar operacionet brenda disa javësh, dhe vështirësia është zbutur nga kapaciteti i papërdorur dhe tepricat ekzistuese të karburantit. Megjithatë, sulmet e thella i kanë dhënë Kievit iniciativën në një moment të rëndësishëm. Shtetet e Bashkuara dhe Evropa po rrisin sanksionet ndaj industrisë së naftës së Rusisë, edhe pse kërkesa e Kievit për raketa Tomahaëk me rreze të gjatë veprimi nga SHBA-ja nuk është miratuar ende. Presidenti Volodymyr Zelenskyy thotë se aftësia e përmirësuar e Ukrainës për sulme me rreze të gjatë veprimi po shkakton dëme të mëdha, duke e detyruar Kremlinin të importojë karburant dhe të frenojë eksportet. “Ne besojmë se ata kanë humbur deri në 20% të rezervave të tyre të karburantit si rezultat direkt i sulmeve tona,” u tha ai gazetarëve në një konferencë shtypi në Kiev.