Libani njoftoi se të paktën dy persona humbën jetën si pasojë e sulmeve me dronë të kryer nga Izreli. Viktimat, babë e bir, u regjistruan në një fshat në jug të vendit. Ky është sulmi i fundit vdekjeprurës, pavarësisht një armëpushimi të arritur në nëntor. Presidenti libanez, Joseph Aoun, e dënoi sulmin, duke e cilësuar “një shkelje flagrante” të marrëveshjes së armëpushimit. Por ushtria izraelite tha se ka vrarë një anëtar të Hezbollahut dhe një operativ të Brigadës Libaneze të Rezistencës, që është një grup i lidhur me grupet militante të mbështetura nga Irani. Në njoftimin e ushtrisë izraelite thuhet se dy burrat “posedonin armë të përdorura nga Hezbollahu për qëllime terroriste dhe për vëzhgimin e ushtarëve izraelitë në rajonin afër kufirit”. Hezbollahu është shpallur grup terrorist nga Shtetet e Bashkuara. Javën e kaluar, Izraeli paralajmëroi se do të vazhdojë sulmet ajrore ndaj caqeve të Hezbollahut në mbarë Libanin. Qeveria libaneze e ka dënuar një sulm masiv izraelit në jug të Bejrutit javën e kaluar, në prag të festës myslimane të Kurban Bajramit.