Zyrtarët ukrainas deklaruan të dielën se Rusia ka kryer sulmin më të madh ajror ndaj Ukrainës që prej shpërthimit të luftës tre vite më parë, duke e cilësuar këtë si një përshkallëzim serioz që rrezikon çdo përpjekje për zgjidhje paqësore të konfliktit. Sipas Forcave Ajrore të Ukrainës, gjatë këtij sulmi u përdorën gjithsej 537 armë ajrore, përfshirë 477 dronë dhe 60 raketa të tipeve të ndryshme. Nga to, 249 u rrëzuan nga mbrojtja ajrore ukrainase, ndërsa 226 të tjera u neutralizuan përmes mjeteve të luftës elektronike. Një zëdhënës tha për agjencinë Associated Press se ky ishte “sulmi më i madh ajror që ka përfshirë njëkohësisht dronë dhe raketa në territorin e Ukrainës”. Goditjet ruse nuk u kufizuan vetëm në zonat e luftës në lindje, por prekën edhe rajonet perëndimore të vendit, larg vijës së frontit. Për shkak të rrezikut të zgjerimit të sulmeve, Forcat Ajrore të Polonisë dhe aleatët e NATO-s aktivizuan avionët ushtarakë për të siguruar hapësirën ajrore të Polonisë, siç bëhet e ditur në një deklaratë zyrtare.