Policia ka goditur një rast të shitjes së lëndëve narkotike, duke arrestuar në flagrancë dy shtetas që shpërndanin kokainë Në zonën e Himarës, Operacioni policor i koduar “Wave”, i zhvilluar nga Seksioni për Hetimin e Narkotikëve në policinë e Vlorës, në bashkëpunim me Komisariatin e Policisë Himarë, vuri në pranga dy 46 vjeçarë. Gjatë kontrollit të ushtruar në automjetin tip “Fiat” dhe në banesën që kishin në përdorim në fshatin Vuno, policia gjeti dhe sekuestroi 46 doza kokainë gati për shitje, një peshore elektronike, tre celularë dhe një shumë parash në euro dhe lekë, të dyshuara si të përfituara nga aktiviteti kriminal. Dy të arrestuarit akuzohen për veprën penale “Prodhimi dhe shitja e narkotikëve”, kryer në bashkëpunim, ndërsa hetimet vijojnë për identifikimin e personave të tjerë të përfshirë.