Dy persona janë arrestuar në Selanik, ndërsa një tjetër është shpallur në kërkim, pasi dyshohet se janë pjesë e një organizate kriminale ndërkombëtare që trafikonte sasi të mëdha marijuane nga Shqipëria drejt Turqisë, përmes territorit grek. Operacioni u zhvillua në orët e para të së premtes nga autoritetet greke, në bashkëpunim me strukturat greke kundër narkotikëve. Hetimi u krye edhe me mbështetjen e autoriteteve të Maqedonisë së Veriut dhe Kosovës. Sipas hetimeve, grupi përdorte kamionë të transportit ndërkombëtar dhe fshihte drogën në hapësira të krijuara posaçërisht brenda ngarkesave me letër për riciklim. 43-vjeçari i arrestuar dyshohet se merrte drogën nga Shqipëria dhe e fshihte në ngarkesat e kamionëve, ndërsa 58-vjeçari kishte rol në transportin dhe dërgimin e saj drejt Turqisë.