Pronari dhe kamarieri i një lokali nate në zonën e Potamit në Himarë u arrestuan nga policia pas gjetjes së qindra dozave lënde narkotike në mjediset ku ushtrohej biznesi. Policia njofton se ndërmori aksionin pas informacioneve të siguruara në rrugë operative, se në lokalin në fjalë shitej kokainë dhe hashash. Pas ndërhyrjes në mjediset e biznesit përfundoi në pranga pronari i lokalit, 33 vjeç, banues në Tepelenë, bashkë me kamarierin 20 vjeçar, banues në Lazarat. Policia thotë se 20-vjeçarit iu gjetën gjatë kontrollit fizik, 5 doza lënde të dyshuar narkotike Kokainë dhe 8 doza lënde të dyshuar narkotike Cannabis Sativa, ndërkaq, gjatë kontrollit në banesën e 33-vjeçarit, u gjetën 145 doza të tjera lënde të dyshuar narkotike Kokainë, 1 peshore elektronike, si dhe 1 armë sportive që posedohej pa leje.