Policia e Shtetit ka vënë në pranga 24-vjeçarin Klinder Luka, i cili ishte shpallur në kërkim si pjesë e një grupi kriminal në fushën e narkotikëve. Operacioni ndërkombëtar “SACRIPANTE.AL”, ishte iniciuar nga Prokuroria e Venecias, në vitin 2022. Gjykata e Venecias ka lëshuar urdhër arresti për këtë shtetas, mbi dyshime për kryerje të veprave penale në fushën e narkotikëve, në kuadër të grupit të strukturuar kriminal, sipas Kodit Penal italian. Operacioni për vënien në pranga 24-vjeçarin u krye në koordinim me partnerët italianë. Gjatë operacionit u vunë në pranga në Itali dhe 10 shtetas. Interpol Tirana po bashkëpunon me homologët, për ekstradimin në Itali, të shtetasit të arrestuar. Policia ka vënë në pranga një 25-vjeçar përmes një tjetër operacioni të koduar “Destinacioni 4”. I riu dyshohet se trafikonte lëndë narkotike kanabis me përqindje të lartë THC, nga Tajlanda në Shqipëri, nëpërmjet shërbimit postar. 25-vjeçar me iniciale R.S. u kap në flagrancë nga me një pako me 2 kilogramë lëndë të dyshuar narkotike kanabis me përqindje të lartë THC, që dyshohet se është trafikuar nga Tajlanda. Policia sekuestroi 2 kilogramët lëndë narkotike kanabis me përqindje të lartë THC, me vlerë 40 000 euro, shuma parash, celularë, sende me vlerë dhe prova të tjera të vlefshme të hetimin.