Policia e Fierit ka vënë në pranga një 28 vjeçar pasi shiste lëndë narkotike kokainë dhe kanabis në doza, nga banesa e tij, në lagjen “Afrim i Ri”. Ai rezulton me precedent në këtë fushë. Ndërkohë në pranga ka rënë dhe një 30-vjeçar, i cili ka blerë lëndë narkotike tek ky shtetas. Ndërsa janë vënë nën hetim katër persona, mes tyre dy të mitur, blerës të dozave të lëndëve narkotike. 28-vjeçari u kap në flagrancë duke i shitur në banesën e tij, dozat e drogës këtyre pesë personave. Në total janë sekuestruar 508 gramë kokainë dhe qindra doza kanabis, me vlerë në treg rreth 90 mijë euro. Gjithashtu, janë sekuestruar pajisje për ndarjen e lëndëve narkotike në doza, 8 celularë dhe 2 automjete. Operacioni policor i koduar koduar “Price” u realizua nga specialistët e Seksionit për Hetimin e Narkotikëve, në bashkëpunim me specialistët e Seksionit Operacional dhe me Prokurorinë e Fierit.