Qeveria emëroi Gentian Gjylin drejtor të përgjithshëm të Autoritetit Rrugor Shqiptar, pas arrestimit të Evis Berberit, si i dyshuar për dy vepra penale ‘Korrupsion’ dhe ‘Pastrim Parash’. Më herët, Gentian Gjyli ka mbajtur funksionin e zëvendësdrejtorit të përgjithshëm të Autoritetit Rrugor Shqiptar, teksa që pas arrestimit të Berberit ka ushtruar kompetencat drejtuese të këtij institucioni. Berberi dhe 2 biznesmenë u arrestuan mbrëmjen e 13 marsit, me urdhër të SPAK. Evis Berberi akuzohet nga SPAK se ka favorizuar kompaninë e tij duke i dhënë tendera, jo vetëm si drejtor i Autoritetit Rrugor Shqiptar, por edhe gjatë kohës që drejtonte Agjencinë për Eficencën e Energjisë. SPAK thotë se kompania pas të cilës akuzohet se qëndronte Evis Berberi ka përfituar 1.1 milionë euro tendera nga Autoriteti Rrguor Shqiptar, gjatë kohës kur Berberi ishte në krye. Evis Berberi u emërua në krye të ARRSH në muajin qershor të vitit 2021. Në shkurt të vitit 2019, para se të emërohej këshilltar në Ministrinë e Energjisë dhe Infrastrukturës, Evis Berberi shiti të gjitha aksionet e një kompanie private që kishte blerë në 2018-n. SPAK se dyshon se bëhet fjalë për një transferim fiktiv të kompanisë me qëllim që Evis Berberi të shmangte konfliktin e interesit