Teksa Shqipëria vijon të përballet prej ditësh me dhjetëra vatra zjarresh, është komanduar drejtori i ri i Mbrojtjes nga Zjarri dhe Shpëtimi, Ervis Gjoshi. Ministri i Punëve të Brendshme, Besfort Lamallari, prezantoi drejtorin e ri të komanduar, pas dorëheqjes së kreut të Zjarrfikësve Arben Cara. Lamallari tha se rishikimi i kuadrit ligjor për zjarrfikësen dhe një program kombëtar për parandalimin e zjarrit, do të jetë në fokus të Gjoshit. “Me një karrierë prej 18 vitesh në Policinë e Shtetit, me përvojë të gjatë në drejtimin e strukturave të sigurisë, si zëvendësdrejtor për Rendin dhe Sigurinë në DVP Tiranë dhe më herët si shef Komisariati në Dibër, ai sjell në këtë detyrë eksperiencën dhe përgjegjshmërinë e nevojshme për një strukturë kaq të rëndësishme”, shprehet ministri Lamallari.