Prokurori i Përgjithshëm i Shteteve të Bashkuara, Merrick Garland, tha se nuk do të lejojë që Departamenti i Drejtësisë “të përdoret si një armë politike”, ndërsa denoncoi “teoritë konspirative” dhe “gënjeshtrat e rrezikshme” që vënë në shënjestër organet federale të zbatimit të ligjit. Gjatë një takimi në Uashington me prokurorët amerikanë dhe pjesëtarë të tjerë të Departamentit të Drejtësisë, Garland mbrojti me forcë integritetin dhe paanshmërinë e departamentit përballë pretendimeve të republikanëve për politizimin e drejtësisë. Garland tha se normat që mbrojnë departamentin nga ndërhyrja politike tani kanë më shumë rëndësi se kurrë. “Normat tona janë një premtim se nuk do të lejojmë që ky dikaster të përdoret si armë politike. Normat tona janë një premtim se nuk do të lejojmë që ky vend të bëhet një shtet ku drejtësia të trajtohet si një degë e politikës”, tha Garland.