Zyra e Prokurorit të Specializuar pranë Gjykatës Speciale për krime lufte me seli në Hagë, ka nisur hetimet për rrjedhjen e dokumenteve “konfidenciale", që ranë në duar të veteranëve të UÇK-së Zyra reagoi lidhur me serinë e dokumenteve të "prokurorisë”, të cilat u lanë për tre herë radhazi nga persona anonimë, në zyrat e veteranëve të luftës së UÇK-së. Prokuroria speciale tha se "disa aktivitete në të cilat është përfshirë Organizata e Veteranëve të Luftës së Ushtrisë Çlirimtare të Kosovës (OVLUÇK), kanë për qëllim të minojnë administrimin e drejtësisë në mënyrë të duhur". Te marten për të tretën herë një person anonim la para zyrave të OVL të UÇK-së, qindra dokumente të cilat pretendohet sa janë të Prokurorisë Speciale me seli në Hagë, e cila heton ish-pjesëtarë të UÇK-së me pretendimet se kanë kryer krime lufte në Kosovë. Përmbajtja e këtyre dokumenteve akoma nuk është e qartë, sikundër që nuk është konfirmuar nëse janë origjinale apo jo. Zëdhënësi i Zyrës së Prokurorit të Specializuar, Christopher Bennett, në një deklaratë për shtyp tha se "zyra e Prokurorit të Specializuar në Hagë, ka nisur hetimet për "rrjedhjen” e këtyre dokumenteve të pretenduara konfidenciale dhe është e angazhuar të hetojë e ndjekë penalisht me forcë individë që kryejnë krime të tilla, që përfshijnë publikimin e identitetit të individëve të cilët mund të thirren para gjykatës apo të ndonjë informacioni që mund të çojë në identifikimin e tyre".