Shkalla e parë e gjykatës së posaçme ka dalë me vendim në lidhje me një fraksion të dosjes voluminoze të njohur si ‘Revanshi’. Në përfundim të gjykimit, që u zhvillua me procedurën e gjykimit të shkurtuar u dhanë dënime me burg për shtatë persona, më konkretisht për Durim Bamin, Altin Morinën, Oltion Zefin, Aldo Avdylajn, Jozi Krajën, Henerigert Mitri dhe Edson Jozvik, njohur edhe me emrin Edison Pjetri. Dënimi më i lartë është dhënë për Durim Bamin, i cili ka marrë 10 vite e 8 muaj burgim. Bami është shpallur fajtor për sigurimin e kushteve dhe mjeteve për kryerjen e një vrasjeje, kultivim të bimëve narkotike dhe krijimin e drejtimin e një grupi të strukturuar kriminal. 10 vite burg në mungesë mori Oltion Zefi, i akuzuar për trafikim narkotik dhe organizim grupi kriminal. Edson Jozvik është dënuar me 8 vite burgim për trafikim narkotikësh dhe pjesëmarrje në grup të strukturuar kriminal. Për ish efektivin e RENEA-s, Altin Morinën gjykata ka dhënë 6 vite e 8 muaj burgim. Ai është shpallur fajtor për kultivim të bimëve narkotike, pjesëmarrje në grup të strukturuar kriminal dhe mbajtje pa leje të armëve. 5 vite e 4 muaj është dënuar Henerigert Mitri, për kultivim droge dhe shpërdorim detyre, ndërsa dy të tjerët, Jozi Kraja dhe Aldo Avdyli gjykata vendosi 4 vite e 8 muaj burgim. Këto janë vendimet e GJKKO pas aplikimit të zbritjes së një të tretës së dënimit për shkak të gjykimit të shkurtuar.