Ekzekutimi i biznesmenit Behar Sofia më 25 shkurt të këtij viti tronditi opinionin publik, pasi ishte një vrasje e regjistruar në mes të ditës, në mes të kryeqytetit. Hetimet për këtë ngjarje vazhdojnë, ndërkohë që u raportua se vrasja ishte kryer kundrejt një shume prej 50 mijë eurosh, ndërsa si autor i dyshuar i saj u arrestua Ernejt Shyti. Ky i fundit, u prangos në Malin e Zi disa javë pas ngjarjes, teksa policia tha se kishte gjetur maskën, por edhe biçikletën me të cilën ai ishte larguar pas krimit. Si bashkëpunëtorë të Ernejt Shytit, fillimisht u arrestuan Skënder Vathi, Leonard Xhixha, dhe Xhuljano Visha, ndërsa sot Policia e Tiranës njoftoi se ka identifikuar si bashkautor dhe shtetasin Bujar Leza, i cili ndodhet në burgun e Fushë Krujës, me akuzën e dhunës në familje. Leza kishte njohje me të arrestuarin tjetër si bashkëpunëtor Leonard Xhixha dhe dyshohet se kanë qenë personat të cilët po vëzhgonin biznesmenin Behar Sofia pak para se të kryhej vrasja pranë zonës së Piramidës në Tiranë. Njohja me Xhixhës dhe Lezës vërtetohet nga hetimet e kryera më herët nga Policia ku këta dy shtetas, të ndihmuar edhe nga një banor i fshatit Gjoricë në Bulqizë, më 10 Nëntor të 2014-ës kanë tentuar të vrasin shtetasin Fatjon Alimani. Por, edhe dy bashkautorët e tjerë nuk janë emra të panjohur për Policinë. Për shtetasin Skënder Vathi, Prokuroria e Krujës i kërkoi gjykatës caktimin e masës së sigurisë arrest me burg, pasi në bashkëpunim me dy persona të tjerë vendosën një sasi eksplozivi që ka shpërthyer pranë një rrobaqepësie, në rrugën “Punëtori” në Fushë-Krujë, në nëntor të vitit 2016. Ndërsa shtetasi Xhuljano Visha, është dënuar më herët për veprën penale “Vjedhja”.