Përpjekja e Akademisë së Albanologjisë për të kundërshtuar në rrugë ligjore vendimin e qeverisë që e shkrin me Akademinë e Shkencave vijon në Gjykatën Administrative. Megjithatë, rektori i kësaj akademie, Luan Përzhita ka paraqitur dorëheqjen nga ky post pranë Ministrisë së Arsimit prej një jave. Dorëheqja nuk është miratuar ende nga ana e kësaj ministrie, por pritet që kjo të ndodhë shumë shpejt. Dorëheqja e sipas rektorit të dorëhequr të Akademisë së Studimeve Albanologjike, Luan Përzhita nuk cenon procesin e kundërshtimit në rrugë ligjore të VKM-së së qeverisë. Albanologjia ka dorëzuar në gjykatën administrative kërkesën për të shpallur këtë VKM si antiligjore dhe antikushtetuese. Një pikë e mbrojtjes lidhet me faktin që Përzhita është emëruar me dekret nga Presidenti i Republikës në këtë post dhe nuk mund të shkarkohet me një vendim të qeverisë.