Kanë nisur largimet e para nga postet drejtuese pas skandalit të publikimit të pagave të më shumë se 600 mije shqiptarëve në platformat online. Drejtori i Sistemit Informatik të Tatimeve Ervin Muca, 3 ditë pas skandalit të publikimit të pagave online ka dhënë dorëheqjen dhe është vendosur në dispozicion të hetimeve. Lista e pagave të rreth 630 mijë shqiptarëve, punonjës në banka, biznese, ambasada, kompani private apo shtetëore u publikua mbrëmjes e së martës, ndërsa bëri xhiron e rrjetit dhe tronditi mbarë opinionin publik, duke u cilësuar si një nga skandalet më të mëdha pas asaj të patronazhistëve, ku po ashtu në periudhë fushate u publikuan të dhënat personale të qindra personave. Ndëkrohë këtë të premte skandali u thellua edhe më shumë, ndërsa u publikuan lista me targat e makinave të mbi 500 mijë shqiptarëv. Dokumenti përmban të dhëna personale si tipi i makinës dhe targa e saj. Nga ana tjetër, Autoriteti i Mediave Audiovizive ka njoftuar mediat për shqetësimin e Komisionerit për Mbrojtjen e të Dhënave Personale duke bërë thirrje që të merren masa për ndalimin e transmetimit dhe përpunimit të paligjshëm të të dhënave personale.