Zyra kryesore e Agjencisë Amerikane për Zhvillim Ndërkombëtar në Uashington u mbyll papritur të hënën dhe punonjësve iu dërgua një email pak pas mesnate ku u thuhej se nuk duhet të paraqiteshin në punë. “Selia qendrore e USAID-it do të jetë e mbyllur për personelin e Agjencisë të hënën. Personeli i agjencisë i caktuar normalisht për të punuar në seli do të punojë në distancë, me përjashtim të personelit me funksione thelbësore dhe të mirëmbajtjes ", thuhej në emailin e siguruar nga CNN. Kjo është shenja më e fundit ogurzezë për agjencinë ndërkombëtare të ndihmës, e cila e ka gjetur veten në epiqendrën e përpjekjeve të Presidentit Donald Trump dhe Elon Musk për të reformuar qeverinë federale. Trump ka thënë se agjencia, e krijuar nga Kongresi si një organ i pavarur, është haptazi mbështetëse e demokratëve. Në një postim në X, të hënën në mëngjes, Elon Musk tha se trump ishte dakord që agjencia duhet të mbyllet pas ditëve spekulime mbi të ardhmen e saj, pasi financimet e saj u ndalën dhe dhjetëra punonjës u lanë pushim. Musk tha se ai kontaktoi me Trump "disa herë" dhe Trump konfirmoi se dëshiron ta mbyllë agjencinë, e cila shpërndan miliarda dollarë ndihma humanitare dhe fonde zhvillimi çdo vit. Madje Musk shkoi edhe më tej duke e quajtur agjencinë një organizatë kriminale. Të dielën në mbrëmje, kur iu kërkua një koment për USAID-in, Trump u tha gazetarëve: “Ajo drejtohet nga një grup të çmendurish radikalë”. Gjatë fundjavës, dy zyrtarë të lartë të sigurisë në USAID u pezulluan nga puna pasi refuzuan të lejonin pjesëtarët e Departamentit të Efikasitetit të Qeverisë që të hynin në sistemet e agjencisë. Po ashtu rreth 60 zyrtarë të lartë të agjencisë u pezulluan javën e kaluar nën akuzat se kishin anashkaluar urdhrin zyrtar të Trump për ngrirjen e ndihmave të huaja për 90 ditë. USAID u themelua në vitin 1961 nga presidenti John F. Kennedy dhe është krahu humanitar i qeverisë amerikane. Ai shpërndan miliarda dollarë çdo vit në mbarë botën në një përpjekje për të zbutur varfërinë, për të trajtuar sëmundjet dhe për t'iu përgjigjur zisë së bukës dhe fatkeqësive natyrore. Ai gjithashtu promovon ndërtimin dhe zhvillimin e demokracisë duke mbështetur organizatat joqeveritare, mediat e pavarura etj