Donald Trump duket se e ka zbuluar përfundimisht inteligjencën artificiale si qendrën e re krijuese për komunikimet e tij online. Imazhi i fundit i postuar në profilin e tij në Truth Social nuk bën përjashtim: një pamje me sa duket e gjeneruar nga IA e tregon Trump duke ecur përkrah një krijese gri, që të kujton alienët që shohim në filma. Krijesa shfaqet me krahët dhe këmbët e lidhura me zinxhirë, e rrethuar nga agjentë specialë dhe një oficer ushtarak amerikan. Në sfond janë male dhe struktura që të kujtojnë Zonën 51, vendin e famshëm ushtarak në Nevada që për dekada ka qenë në qendër të teorive të konspiracionit në lidhje me UFO-t dhe studimet sekrete mbi alienët. Imazhi qarkulloi shpejt në internet, duke shkaktuar ironi dhe diskutime. Publikimet vijnë në një kohë veçanërisht të ndjeshme në Shtetet e Bashkuara. Më 8 maj, autoritetet amerikane filluan të bënin publike dosjet mbi objektet fluturuese të paidentifikuara të premtuara nga Trump. Deri më tani janë publikuar dhjetëra materiale, duke përfshirë fotografi, video dhe dëshmi të mbledhura gjatë viteve nga personeli ushtarak dhe zyrtarët qeveritarë. Pentagoni ka njoftuar tashmë se dokumentet do të vazhdojnë të publikohen, me përditësime të planifikuara çdo javë. Në të njëjtën kohë, Departamenti i Mbrojtjes ka kërkuar një rritje të konsiderueshme të fondeve për Forcën Hapësinore për vitin fiskal 2027. Kërkesa synon forcimin e kapacitetit operacional të Amerikës në hapësirë, e cila tani konsiderohet një fushë strategjike kyçe për sigurinë kombëtare. Ndër projektet në zhvillim e sipër është sistemi i mbrojtjes nga raketat "Kupola e Artë", i cili pritet të integrojë sistemet e ardhshme të armëve hapësinore.