Një Gjykatë e Apelit në SHBA refuzoi përkohësisht kërkesën e një komiteti - që po heton trazirat e 6 janarit në Kongres - për të pasur akses në të dhënat e Shtëpisë së Bardhë të ish-presidentit Donald Trump. Vendimi vjen dy ditë pasi një gjykatëse federale urdhëroi që dokumentet t'i dorëzohen Komitetit hetues. Komiteti, i përbërë nga ligjvënës të Dhomës së Përfaqësuesve, po përpiqet të zbulojë nëse Trumpi ka pasur njohuri paraprake për trazirat. Më 6 janar, mbështetësit e Trumpit sulmuan ndërtesën e Kongresit, ndërsa ligjvënësit po mblidheshin për të vërtetuar rezultatin e zgjedhjeve presidenciale. Trumpi refuzoi të pranojë humbjen përballë presidentit Joe Biden në zgjedhjet e vitit të kaluar, duke pretenduar - pa prova - se ka pasur mashtrime masive në votime. Hetimet po bëhen nga një komitet i ngritur nga Dhoma e Përfaqësuesve, e cila dominohet nga demokratët e presidentit Biden.