Është zbardhur dëshmia e Poli Boriçit, 52-vjeçarit të arrestuar për atentatin e dështuar në Elbasan. Para hetuesve ai ka deklaruar se ka tentuar të vrasë Ermir Kërtezin, për shkak të një konflikti të mbartur të 15 viteve më parë. “E bëra për t’u hakmarrë për vëllain tim, të cilin e ka plagosur 15 vite më parë”-ka deklaruar 52-vjeçari para grupit hetimor. Boriçi ka pretenduar se Kërtezi kishte plagosur vëllain e tij dhe pasojat kishin qenë të rënda, deri në paralizimin e tij. Ky version pritet të jetë pjesë e hetimeve për zbardhjen e plotë të motivit të atentatit, ndërsa prokuroria po verifikon rrethanat e konfliktit të hershëm dhe nëse ai ka qenë realisht shkaku që e ka shtyrë 52-vjeçarin drejt sulmit. Nga ana tjetër, shënjestra Ermir Kërtezi ka deklaruar se marrëdhëniet mes tyre ishin normalizuar prej vitesh dhe se dy familjet banonin pranë njëra-tjetrës, pa pasur konflikte gjatë rreth 15 viteve të fundit.