Këtë vit, kancelari gjerman Friedrich Merz u zotua të ndërtojë ushtrinë më të fortë të Evropës, një detyrë e vështirë për një vend, ushtria e të cilit është lënë për vite të tëra në neglizhencë. Qeveria e koalicionit shpreson se një projektligj i ri i miratuar javën e kaluar do të ndihmojë në realizimin e këtij objektivi, duke forcuar ushtrinë e Gjermanisë përballë kërcënimit të perceptuar nga Rusia dhe një ndryshimi të rëndësishëm në politikën e jashtme të SHBA-së. Reformat e reja rrënjësore do ta shohin Gjermaninë të përpiqet të rrisë numrin e saj në 260,000 ushtarë, nga rreth 180,000 që janë aktualisht, përveç 200,000 rezervistëve shtesë, deri në vitin 2035. Në radhë të parë, nisma do të përqendrohet në rekrutimin vullnetar, me stimuj më të mëdhenj për ata që regjistrohen, duke përfshirë një pagë fillestare mujore prej 2,600 €, një rritje prej 450 € nga niveli aktual. Nëse kuotat e reja nuk përmbushen, qeveria do të ketë mundësinë e rekrutimeve të detyrueshme, kur të jetë e nevojshme. Kjo vjen ndërsa administrata Trump paralajmëron se Evropa duhet të marrë përgjegjësinë për sigurinë e saj, ndërsa lufta e Rusisë në Ukrainë vazhdon dhe ekspertët në rajon sugjerojnë se Moska mund të pushtojë një shtet të NATO-s. Sipas tyre Gjermania ka potencialin të luajë një rol kyç në mbrojtjen konvencionale të Evropës, duke pasur parasysh vendndodhjen e saj qendrore gjeografike. Shefi i mbrojtjes së Gjermanisë, gjenerali Carsten Breuer, tha në një intervistë me BBC në qershor se NATO duhet të përgatitet për një sulm të mundshëm rus brenda katër viteve të ardhshme, ndoshta që në vitin 2029, duke i nxitur shtetet anëtare të jenë të përgatitura.