Dy pistoleta që Napoleon Bonaparti synonte dikur t'i përdorte për të vrarë veten, u shitën në Francë të dielën për 1.69 milion €, me qeverinë që ndaloi eksportin e tyre në mënyrë që ato të qëndrojnë në vend si thesare kombëtare. Identiteti i blerësit në ankandin në Fontanblu në jug të Parisit, të objekteve të zbukuruara në detaje, nuk u bë publik, por çmimi përfundimtar i shitjes, shkoi përmbi vlerësimet prej 1.2-1.5 milionë eurove që mendoheshin paraprakisht. Armët e dekoruara, të zbukuruara me ar dhe argjend, mbajnë imazhin e gdhendur të Napoleonit, në pompozitet të plotë perandorak. Thuhet se ato thuajse janë përdorur për t'i dhënë fund jetës së sundimtarit francez në vitin 1814, kur ai u detyrua të hiqte dorë nga pushteti pasi forcat e huaja mundën ushtrinë e tij dhe pushtuan Parisin. “Pas humbjes së fushatës franceze, ai ishte plotësisht i dëshpëruar dhe donte të bënte vetëvrasje me këto armë, por ndihmësit e tij ia hoqën barutin”, tha eksperti i shtëpisë së ankandeve Jean-Pierre Osenat. Napoleoni në vend të kësaj piu helm, por volli dhe mbijetoi, ndërsa më vonë ia dha pistoletat ndihmësit, për ta falënderuar për besnikërinë e treguar. Pas abdikimit të tij, Napoleoni u dërgua në mërgim në ishullin e Elbës, në brigjet e Italisë. Më pas, ai u kthye në mënyrë dramatike në francë, vetëm për t'i dhënë goditjen e fundit lavdisë së tij si gjeneral i madh, kur u mund nga britanikët në Betejën e Vaterlosë, në 1815, dhe më pas vdiq në azil në ishullin e Shën Helenës, gjashtë vite më vonë. Objektet që i përkisnin napoleonit, janë jashtëzakonisht të kërkuara nga koleksionistët. Një nga kapelat e famshme të tij, u shit për 1.9 milionë euro në nëntor.