Donald Trump dhe Volodymyr Zelensky pritet të takohen sërish, brenda pak ditësh, për të zgjidhur pengesat e fundit për një marrëveshje paqeje në Ukrainë. Të dy presidentët pritet të zhvillojnë bisedime kritike në Uashington që këtë javë, me Zelenskin që po peshon një udhëtim të shpejtë në SHBA për të zgjidhur çështjet më shpërthyese në planin e ri prej 19 pikash. Udhëheqësi ukrainas tha se ishin bërë "hapa të rëndësishëm", por paralajmëroi se zgjedhjet më të vështira ende janë përpara. "Ka ende punë për të gjithë ne, është shumë sfiduese të finalizojmë dokumentin, dhe ne duhet të bëjmë gjithçka me dinjitet", tha Zelenski. Trump po ashtu ka rritur pritshmëritë duke lënë të kuptohet se përparimi më në fund mund të jetë i arritshëm. Ai shkroi një ditë më parë në Truth Social: “A është vërtet e mundur që po bëhet përparim i madh në bisedimet e paqes midis Rusisë dhe Ukrainës??? Mos e besoni derisa ta shihni, por diçka e mirë mund të jetë duke ndodhur”. Dhe kjo vjen ndërsa SHBA raportohet se ka zhvilluar bisedime sekrete me Rusinë dhe Ukrainën në Abu Dhabi, ndërsa ekipi i Donald Trump po nxiton të miratojë një plan paqeje të ripunuar. E ndërsa pjesa tjetër e botës kërkon paqen, Vladimir Putin kreu një nga sulmet më të ashpra gjatë natës në Ukrainë, duke vrarë të paktën gjashtë persona.