Ambasadori amerikan në Sarajevë, Michael Murphy, paralajëmroi se “Shtetet e Bashkuara nuk do të rrinë duarkryq ndërsa presidenti i Republikës Serbe Milorad Dodik dhe sejmenët e tij politikë përpiqen të copëtojnë strukturën e Bosnjës dhe Hercegovinës, të destabilizojnë vendin dhe rajonin dhe të pengojnë përparimin e Bosnjës drejt Bashkimit Evropian”. Reagimi i ambasadori Murphy pasoi deklaratat e Milorad Dodikut dhënë medias ruse Sputnik, për krijimin e “një shteti të përbërë nga Serbia, Republika Serbe e Bosnjës dhe Kosova, dhe nëse ka një vendim të tillë demokratik, edhe nga Mali i Zi”. Dodik akuzoi Shtetet e Bashkuara dhe Britaninë e Madhe për qëndrim antiserb. Në një reagim më të gjatë, ambasadori Murphy shkroi se Shtetet e Bashkuara të Amerikës janë të palëkundura në angazhimin e tyre ndaj Bosnjës dhe Hercegovinës, tërësisë së saj tokësore, sovranitetit dhe karakterit shumetnik të saj. “Deklaratat e fundit të pamatura të Dodik për përmbysjen e kufijve kombëtarë në Ballkanin Perëndimor për të krijuar një shtet të bashkuar serb, janë jo vetëm destabilizuese për Bosnjën dhe Hercegovinën, por gjithashtu kërcënojnë sigurinë dhe qëndrueshmërinë e rajonit. Ky përshkallëzim i fundit është në vazhdën e një fushate të vazhdueshme të retorikës dhe veprimeve destabilizuese që synojnë të dëmtojnë Marrëveshjen e Paqes të Dejtonit dhe shtetin e Bosnjës”, thuhet në reagimin e ambasadorit Murphy, ku numërohen veprimet e udhëheqësit pro rus Milorad Dodik për bllokimin e qeverisjes në Bosnjë, kërcënimin e paqes dhe shantazhimin e udhëheqësve të tjerë politik si edhe të përfaqësuesve ndërkombëtarë. Ambasadori Murphy shkroi mes tjerash se në Republikën Serbe Milorad Dodik po punon për t'u mohuar banorëve të drejtat dhe liritë e tyre themelore, si lirinë e shtypit, të fjalës dhe të tubimit, për të mbrojtur veten nga kritikat dhe përgjegjësia. Shtetet e Bashkuara kanë sanksionuar dhjetëra persona në Bosnjë përfshirë presidentin e Republikës Serbe, Milorad Dodik dhe anëtarët e familjes së tij “për veprimtari korruptive” dhe “kërcënim të vazhdueshëm ndaj qëndrueshmërisë dhe tërësisë tokësore të Bosnjës dhe Hercegovinës”.