Pjesa më e madhe e japonezëve nuk mbështesin rritjen e taksave për të financuar avancimin e ushtrisë. Në këtë përfundim, sipas mediave japoneze, ka dalë një sondazh i kryer së fundmi. Sondazhi pason vendimin e qeverisë për buxhetin më të madh ushtarak që pas luftës së dytë botërore, që ka si qëllim rikthimin e fuqishëm të ushtrisë së vendit. Japonia ka bërë të ditur se shpenzimet për këtë qëllim do të arrijnë në 320 miliardë dollarë. Sipas qeverisë japoneze, vendi do të blejë raketa që mund të sulmojnë Kinën, dhe të përgatisë ushtrinë për çfarëdolloj sulmi. Kryeministri japonez, Fumio Kishida, ka thënë se Qeveria nuk do të rrisë taksat në vitin e ardhshëm fiskal, që nis më 1 prill, por në fazat e radhës deri më 2027. Ai ka thënë se Japonia është në “pikë kthese të historisë” dhe se modernizimi ushtarak është “përgjigje ndaj sfidave të shumta me të cilat përballet vendi”. Por ndërkohë, rreth 65 për qind e të anketuarve, kanë kundërshtuar rritjen e taksave për shpenzime ushtarake, ndërsa 87 për qind kanë thënë se arsyetimi i kryeministrit japonez nuk është i mjaftueshëm. Plani pesëvjeçar i Qeverisë japoneze për taksat, dikur i paimagjinueshëm për një shtet paqësor si Japonia, mund ta bëjë vendin të tretin në botë për sa i takon shpenzimeve ushtarake, pas Shteteve të Bashkuara dhe Kinës.