Osetia e Jugut, një rajon separatist i Gjeorgjisë që e quan veten shtet të pavarur, po diskuton me zyrtarët e Moskës që të bëhet pjesë e rusisë, citoi agjencia ruse e lajmeve RIA të dielën kreun e parlamentit të Osetisë së Jugut. Rusia njohu Osetinë e Jugut dhe një rajon tjetër separatist, Abkhazinë, si shtete të pavarura në vitin 2008 pasi trupat ruse zmbrapsën një përpjekje gjeorgjiane për t’i rimarrë këto territore në një luftë pesë-ditore në 2008. Venezuela, Nikaragua, Nauru dhe Siria po ashtu i kanë njohur rajonet si të pavarura. Por Perëndimi ka akuzuar Rusinë për aneksimin efektiv të Abkhazisë dhe Osetisë së Jugut, që përbëjnë edhe një të pestën e territorit të Gjeorgjisë, ndërkohë që Tbilisi dëshiron që të dy rajonet ti kthehen atij. "Ne po diskutojmë të gjitha këto çështje në koordinim të ngushtë me Rusinë, duke marrë parasysh marrëdhëniet dhe traktatet tona dypalëshe," citoi RIA Alan Alborov, kryetarin e parlamentit të Osetisë së Jugut që u pyet në lidhje me mundësinë e mbajtjes së një referendumi për t’u bërë pjesë e Rusisë. "Kur të arrijmë pajtim për këtë ide së bashku me Federatën Ruse, ne do ta bëjmë atë," thotë Alborov. Udhëheqësi i Osetisë së Jugut, që ka mbështetjen e Rusisë, Alan Gagloev, vitin e kaluar shprehu shpresën se rajoni mund të bëhet zyrtarisht pjesë e rusisë, shkruan RIA. Osetia e Jugut u shkëput nga sundimi gjeorgjian pas një lufte në vitet 1991-92, ku disa mijëra njerëz humbën jetën ndërkohë që mban lidhje të ngushta me rajonin fqinj rus të Osetisë së Veriut. Shumica e banorëve në Osetinë e Jugut janë etnikisht të ndryshëm nga gjeorgjianët dhe flasin gjuhën e tyre. Pothuajse e gjithë popullata ka pasaporta ruse. Ata përdorin rublën ruse si monedhën e tyre dhe ekonomia është e varur nga Rusia.