Kryeministri i ardhshëm i Hungarisë thotë se do të ndalojë tërheqjen e vendit nga Gjykata Ndërkombëtare Penale. Peter Magyar, i cili pritet t'i japë fund qeverisjes16-vjeçare të Viktor Orban pas fitores së tij historike në zgjedhje më herët këtë muaj, njoftoi qëllimin e tij me një paralajmërim për Benjamin Netanyahun e Izraelit. Vazhdimi i anëtarësisë në gjykatë do të thotë që ata që kërkohen nga ky organ mund të arrestohen nëse hyjnë në Hungari. Duke folur në një konferencë për shtyp në Budapest, Magyar tha se ia kishte "bërë të qartë këtë" Netanyahut, i cili është kërkuar për krime të dyshuara lufte në Gaza që nga viti 2024. Orban kishte njoftuar vendimin e tij për t'u tërhequr nga Gjykata vitin e kaluar, pjesërisht për shkak të mospajtimit të tij me urdhër-arrestin për homologun e tij izraelit. Kjo duhej të hynte në fuqi më 2 qershor dhe do ta bënte Hungarinë të vetmin vend të BE-së që nuk e njeh juridiksionin e gjykatës, por Magyar, i cili kryeson partinë e qendrës së djathtë Tisza, tha se ekipi i tij "e ka shqyrtuar me kujdes cështjen dhe se tërheqja nga gjykata do të ndalet".