Me ish-udhëheqësin e rrëzuar të Venezuelës, Nicolas Maduron, tashmë në një burg amerikan, presidenti amerikan, Donald Trump, paralajmëroi udhëheqësit autoritarë të vendit të Amerikës së Jugut se do të “paguajnë një çmim shumë të madh” nëse nuk “bashkëpunojnë” me Uashingtonin, edhe mes shqetësimeve globale për sulmin ushtarak amerikan. Trump paralajmëroi presidenten në detyrë të Venezuelës, Delcy Rodriguez, se “nëse ajo nuk bën atë që është e drejtë, do të paguajë një çmim shumë të madh, ndoshta më të madh se Maduro”. Rodriguez, ishte zëvendëse e Maduros përpara se të emërohej presidente në detyrë më 4 janar. Ajo e quajti operacionin e SHBA-së në Venezuelë shkelje të Kartës së OKB-së dhe u zotua se “ne nuk do të jemi kurrë më skllevër”. Në një konferencë për shtyp, një ditë më parë, Trump e përshëndeti operacionin ushtarak në Venezuelë, por nuk dha detaje.. Një gjeneral i lartë amerikan tha se 150 avionë amerikanë ishin përfshirë në sulm pas muajsh përgatitje. Trump shkaktoi reagime kur tha se SHBA do të “drejtojë” përkohësisht vendin e Amerikës së Jugut “derisa të vijë momenti kur të mund të bëhet një tranzicion i sigurt dhe i matur”. Nuk ishte menjëherë e qartë se çfarë nënkuptonte Trump me atë që SHBA-ja do ta “drejtojë” vendin. Ai u tha gazetarëve se po “caktonte njerëz” nga kabineti i tij për të qenë përgjegjës në Venezuelë, pa dhënë detaje shtesë.Zyrtarë të administratës amerikane, përfshirë sekretarin e Shtetit, Marco Rubio, nuk dhanë sqarime kur u pyetën nga gazetarët për planin e Trumpit. Sidoqoftë, Rodriguez, e cila mori rolin e presidentes në detyrë me urdhër të gjykatës së lartë të venezuelës, ka sinjalizuar gatishmëri për pajtim. Rodriguez, e cila mbështetet nga ushtria venezueliane, fillimisht u shfaq sfiduese, duke e quajtur Maduron “presidentin e vetëm” të vendit dhe duke e cilësuar sulmin amerikan si një “njollë të tmerrshme” në marrëdhënie. Pasi Trump sinjalizoi se ishte gati të kryente një valë të dytë veprimesh ushtarake në Venezuelë nëse do të ishte e nevojshme, Rodriguez zbuti qëndrimin, duke shkruar në rrjetet sociale të hënën se Karakasi kërkonte një marrëdhënie “të balancuar dhe të respektueshme” me Uashingtonin.