Rusia është e gatshme të studiojë iniciativat e paqes të presidentit të zgjedhur të SHBA-së, Donald Trump për Ukrainën, kur ai të marrë detyrën javën e ardhshme, tha të martën ministri i Jashtëm Sergei Lavrov. Ai paralajmëroi se komentet e Trumpit për luftën, që sipas tij do ta ndalte brenda 24 orëve nga hyrja në Shtëpinë e Bardhë, ishin bërë para inaugurimit të tij, por Lavrov tha se Rusia e mirëpret faktin që ekipi i Trumpit kishte filluar të fliste për "realitetin në terren" kur diskutohet për Ukrainën. Lavrov tha se kjo u pasqyrua në komentet e Trumpit dhe këshilltarit të ardhshëm të sigurisë kombëtare, Mike Ëaltz. Ky i fundit i tha televizionit ABC të dielën se ishte e qartë se lufta duhet të përfundojë me mjete diplomatike. Ai shtoi: "Unë thjesht nuk mendoj se është realiste të thuhet se ne do të dëbojmë çdo rus nga çdo pëllëmbë e tokës ukrainase, madje edhe nga Krimea. Presidenti Trump e ka pranuar këtë realitet dhe mendoj se ka qenë një hap i madh përpara që e gjithë bota po e pranon tani. Është koha të ecim përpara", tha ai.