Gjykata e Posaçme do të vlerësojë paraditen e së shtunës masën e sigurisë ndaj Durim Bamit, i ekstraduar mbrëmjen e së enjtes nga Dubai në akuzën e sigurimit të kushteve për të kryer vrasje në dëm të ish deputetit socialist, Arben Ndoka. Ende pa dalë para gjykatës, i forti i Niklës u ka dërguar një kërkesë institucioneve shqiptare të drejtësisë. Më konkretisht, 48 vjeçari i është drejtuar Drejtorisë së Përgjithshme të Burgjeve për të mos e izoluar në burgun 313, por në një burg tjetër. “Mos më lini te paraburgimi 313, ka persona që kanë siguruar kushte dhe mjete për të më vrarë”, thotë Bami në letrën e tij. Një prej atyre që sipas hetimeve të SPAK ka bërë përpjekje që të eliminojë Durim Bamin është Emiljano Shullazi. Ky i fundit mbahet në qeli pikërisht tek burgu 313. Durim Bami del në përgjimet Sky dhe Encrochat si një prej organizatorëve të tentativës për të ekzekutuar Arben Ndokën, ish deputet i Partisë Socialiste. Sipas përgjimeve, Durim Bami ka bashkëpunuar me Xhelal Rrajën, vëllain e ish deputetit tjetër të PS, Rrahman Rraja për të ekzekutuar Arben Ndokën. Përgjimet zbulojnë se ekzekutimi i Arben Ndokës lidhej me hasmërinë e vjetër mes tyre, pasi ish deputeti i Qarkut të Lezhës kishte bërë disa tentativa për të eliminuar Durim Bamin, që e akuzonte se ishte i përfshirë në vrasjen e vëllait të tij, Aleksandër Ndoka.