Qeveria e re e Gjermanisë do të kthejë mbrapsht emigrantët pa dokumente, duke rrëzuar kështu politikën e "dyerve të hapura" të ish-kancelares Angela Merkel. Ky është një nga aktet e para nën drejtimin e kancelarit të ri Friedrich Merz, i cili është zotuar të marrë masa të ashpra kundër imigracionit të paligjshëm. Ministri i ri i Brendshëm Alexander Dobrindt njoftoi se urdhri i diskutueshëm i vitit 2015, i cili lejonte emigrantët pa dokumente, të hynin në Gjermani, do të revokohet. Ai tha se ky veprim synon të ulë numrin e migracionit të parregullt. Dobrindt shtoi se do të ketë disa përjashtime nga ndryshimet për disa grupe të cenueshme, përfshirë fëmijët dhe gratë shtatzëna. "Ne nuk do t'i mbyllim kufijtë, por do t'i kontrollojmë kufijtë më rreptësisht, dhe ky kontroll më i fortë i kufijve do të çojë gjithashtu në një numër më të lartë refuzimesh. Ne do ta rrisim gradualisht këtë numër më të lartë refuzimesh dhe kontrollet më të forta në kufij. Do të sigurohemi që, hap pas hapi, më shumë forca policore të vendosen në kufij dhe të mund të kryejnë edhe këto kthime", tha ministri për gazetarët. Dobrindt, i cili është pjesë e krahut konservator të koalicionit qeverisës, planifikon të dërgojë 3,000 oficerë shtesë në kufi - duke e rritur forcën e policisë kufitare në 14,000. Kjo shënon fundin e politikës së dyerve të hapura të vitit 2015 të shpallur nga Angela Merkel, mandati i së cilës pa mijëra azilkërkues të mbërrinin në Gjermani. Shumë prej këtyre njerëzve po iknin nga lufta në Siri. Por kancelari i ri Friedrich Merz, një rival i vjetër i Merkelit brenda CDU-së së qendrës së djathtë, tha të mërkurën: "Bashkimi Evropian duhet t'u dërgojë një sinjal atyre që po nisen për në Evropë pa leje hyrjeje të vlefshme. Dhe mbi të gjitha, ne duhet t'u dërgojmë një sinjal trafikantëve se këto rrugë do të bëhen shumë më të vështira në të ardhmen - dhe se në një moment, ato do të mbyllen krejtësisht. Ky është sinjali i duhur", tha ai. Politika e re dhe më e ashpër e imigracionit vjen në një kohë kur Gjermania po sheh mbështetje në rritje për të djathtën ekstreme. Partia e ekstremit të djathtë AfD pati rezultatin e saj më të mirë deri më sot në zgjedhjet federale të shkurtit, duke përfunduar në vendin e dytë dhe duke rrëzuar SPD-në e kancelarit Olaf Scholz.