“E du shumë këtë njeri, pavarësisht se kjo është problem i madh, do jetë problem i madh për ne, e di shumë mirë se e ka kokën shumë të fortë.” Një vit pasi Rama e pikturoi kandidaten e Shkodrës si një kokëfortë që mund të hapte probleme për të majtët, Marjana Koçeku, deputetja më e re e socialistëve, u bë e para që vendosi të largohet nga grupi parlamentar, për shkaqe ideologjike. Spikati në sytë e kryeministrit përmes influencës në rrjetet sociale për zhvillimin e turizmit në veri të vendit me emrin ‘Neomalësorja’, dhe po në hapësirën virtuale vendosi t’i komunikojë edhe largimin e saj nga grupi socialist. “Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti.” – shkruajti Koçeku. Një ditë më pas të majtët u mblodhën në kryesinë e kuvendit, por nuk mbajtën një qëndrim për kolegen e tyre, pasi vetë Koçeku zgjodhi të mos kishte asnjë bisedë sqaruese as me ta e as me kryetarit e grupit, Taulant Balla, i cili mësohet se në mbledhjen me dyer të mbyllura të socialistëve është shprehur se kjo çështje mund të diskutohet në një moment të dytë.