“Këshillojmë armiqtë tanë të mos bëjnë asnjë gabim strategjik sepse Irani është i gatshëm ti godasë, mbi të gjitha me avionët luftarakë Sukhoi-24, bombarduesit taktikë supersonikë rusë”. Deklarata u bë nga komandanti i forcave ajrore iraniane, Hamid Vahedi, gjatë paradës ushtarake që irani mbajti me rastin e ditës kombëtare të ushtrisë. Përvec Sukhoi-24, flota ajrore e Teheranit mban edhe avionë luftarakë më të avancuar dhe është e gatshme të ndërmarrë një goditje aq të rëndë mbi armiqtë sa që këta të fundit nuk do të munden të ngrenë kokë – shtoi Vahedi. Ndërsa tensionet rajonale janë në qiell, irani nxorri në paradë dronët, raketat dhe trupat e tij, të mërkurën, për të treguar se është gati për cdo përgjigje të Izraelit, pas sulmit të fundjavës. Në paradën e të mërkurës, forcat e armatosura të iranit prezantuan një varg pajisjesh ushtarake, përfshirë dronët dhe raketat balistike me rreze të gjatë veprimi. Mes tyre ishin versione të shumta të dronëve Ababil, Arash dhe Mohaxher, si edhe raketat balistike me rreze të mesme veprimi Dezful dhe sistemi i mbrojtjes ajrore S-300.