Lideri i opozitës turke, Kemal Kilicdaroglu, premtoi të enjten se do t’i kthejë nëpër vendet e tyre miliona migrantë, në rast se fiton në balotazhin e 28 majit. Ai është në garë me presidentin aktual, Recep Tayyip Erdogan. Këto janë deklaratat e para të tij, prej datës 14 maj, kur edhe u mbajtën zgjedhjet parlamentare dhe presidenciale. Në raundin e parë, asnjëri kandidat nuk arriti të fitojë mbi 50 për qind të votave për postin e presidentit. Megjithatë, performanca e Kilicdaroglu ka qenë më e mira e një kandidati opozitar, përgjatë dy dekadave të fundit. Kilicdaroglu, 74-vjeçar, foli të enjten duke u përpjekur të tërheqë vëmendjen e votuesve të krahut të djathtë. Ai, po ashtu, pritet të takohet edhe me Sinan Oganin – figurë e të djathtës ekstreme, i cili i ka fituar 5.2 për qind të votave, në garën për president. Të enjten, ai foli me tone më të ashpra, sesa në fazën e parë të fushatës. “Erdogan, ju nuk i keni mbrojtur kufijtë dhe nderin e vendit”, tha Kilicdaroglu, ish-shërbyes civil. “Ju keni sjellë me qëllim mbi 10 milionë refugjatë në këtë vend. Sapo të vij në pushtet, do t’i dërgoj të gjithë në shtëpi”. Djathtisti Ogan ka thënë se ai do të mbështesë vetëm kandidatin që merret me çështjen e migrantëve dhe lufton “terrorizmin”, referencë në Turqi për militantët kurdë.