Djali i lordit të burgosur meksikan të drogës, Joaquin el Chapo Guzman, është vetëdeklaruar i pafajshëm për akuzat e trafikut të drogës dhe pastrimit të parave në SHBA. Ovidio Guzman, 33 vjec, u ekstradua nga meksika në SHBA të premten. Arrestimi i tij në janar u kthye në një luftë të vërtetë dhe të përgjakshme mes forcave meksikane të sigurisë dhe anëtarëve të kartelit, ku 30 persona mbetën të vrarë. Babai i tij, që ishte një nga themeluesit e kartelit të drogës Sinaloa, po kryen dënimin me burg të përjetshëm në Kolorado. Ovidio Guzman, i njohur si El Raton, miu, përballet me pesë akuza, mes të cilave konspiracion për importin e fentanilit në SHBA. Në një seancë 15 minutëshe, në të cilën ai u shfaq i veshur me kostumin ngjyrë portokalli të burgut dhe foli përmes një përkthyesi, Ovidio Guzman, u vetëdeklarua i pafajshëm. Seanca e radhës do të mbahet në nëntor. Fentanili, një opioid sintetik 50 herë më i fuqishëm se heroina, është tani shkak kryesor i vdekjes së amerikanëve të moshës nga 18 deri në 49 vjec, sipas të dhënave të analizuara nga Uashington Post. Ndërsa ndonjëherë jepet me recetë nga mjekët për të trajtuar dhimbjen ekstreme, fentanili i prodhuar në mënyrë të paligjshme ka përmbytur shtetet e bashkuara dhe ka ndezur një tregti vdekjeprurëse të opioideve. Overdozat e fentanilit janë përshkruar si sfida më e madhe me të cilën SHBA përballet si vend nga sekretari për sigurinë e brendshme, Alehandro Majorkas. Administrata e luftës kundër drogës, DEA, thotë ndërkohë se karteli i drogës Sinaloa është burimi i pjesës më të madhe të fentanilit që trafikohet në shba. Që nga arrestimi i El Chapo Guzman në 2016-ën dhe ekstradimi i tij në shba, katër djemtë e tij, të njohur si El Chapitos, Chapot e vegjël, duket se kanë marrë rolet udhëheqëse në kartel.