Shtetet e Bashkuara të Amerikës mbështesin kërkesat e kreut të SPAK, Altin Dumani për qartësimin e statusit të prokurorëve të posaçëm pas përfundimit të mandatit 9 vjeçar në këtë strukturë. Dumani ka kërkuar në Kuvend që t’u jepet mundësia prokurorëve aktualë të SPAK-ut që të kandidojnë për një mandat të dytë në këtë strukturë. E njëjta kërkesë u shqiptua publikisht nga zv.ndihmës sekretari amerikan i Shtetit për Ballkanin Perëndimor, David Kasanoff. KASANOF - “Për t’u siguruar që SPAK-u do të vazhdojë pandërprerje luftën kundër korrupsionit dhe krimit të organizuar në të ardhmen, ne besojmë se prokurorët e SPAK-ut duhet të lejohen të aplikojnë për të shërbyer sërish pas përfundimit të mandatit të tyre aktual”. Kasanof e përcolli këtë mesazh gjatë aktivitetit të mbajtur këtë të enjte në Tiranë me rastin e 5 vjetorit të themelimit të strukturës së posaçme, ku mori pjesë edhe ambasadori i BE, Silvio Gonzato. Edhe diplomati i Brukselit përcolli të njëjtin mesazh, por me një gjuhë jo aq të drejtpërdrejtë sa kolegu i tij amerikan.